№2 педагогикалық кеңес өткізіліп, оның негізгі тақырыбы «Мұғалімнің кәсіби құзыреттілігін қалыптастыру» болды. Кеңестің мақсаты – педагогтердің кәсіби даму деңгейін көтеру, заманауи талаптарға сай тиімді әдіс-тәсілдерді меңгерту және оқу-тәрбие үдерісін жетілдіру.
Кеңес барысында мұғалімдердің кәсіби шеберлігін арттыру бағытындағы жұмыстар талқыланып, оқушыларды өзін-өзі тәрбиелеуге, өзіндік даму дағдыларын қалыптастыруға ынталандыру жолдары қарастырылды. Әсіресе жаңа оқу жылында ерекше назарды қажет ететін 1-сынып және 5-сынып оқушыларының адаптациялық кезеңі жан-жақты сараланды.
1-сыныптағы бейімделу жұмыстары бойынша:
– мектеп ережелеріне үйрету,
– психологиялық қолдау көрсету,
– оқу дағдыларын қалыптастыру,
– ата-аналармен тұрақты байланыс орнату мәселелері сөз болды.
Психолог пен бастауыш сынып мұғалімдерінің бірлескен жұмыс жоспары бекітілді.
5-сынып оқушыларының орта буынға бейімделуі жөнінде:
– пән мұғалімдерінің ауысуына үйрену,
– күнделікті оқу жүктемесін басқару,
– сынып ішілік қарым-қатынасты нығайту,
– оқу мотивациясын арттыру бағыттары талданып, әдістемелік ұсыныстар жасалды.
Сынып жетекшілері мен пән мұғалімдерінің үйлесімді әрекет етуі маңызды екені атап өтілді.
Сонымен қатар педагогикалық кеңесте 1-тоқсан қорытындысы тыңдалды. Оқу-тәрбие жұмысының нәтижелері егжей-тегжейлі талданып, оқу үлгерімі, тәрбие бағыты, оқушылардың қатысу белсенділігі бойынша талдау жүргізілді. Алдағы тоқсанда атқарылатын жұмыстардың бағыттары айқындалып, нақты міндеттер белгіленді.
Педагогикалық кеңес мұғалімдердің кәсіби ықпалдастығын арттыра отырып, алдағы жұмысқа жаңа серпін берді.
